香港富家子甚多，往英國寄宿學校讀書坐商務客位，甚至頭等艙嘅十歲學生，所在多有，但15歲富家子戴一隻市值十一萬勞力士Submariner Green運動錶，惹人注目嘅，就比較少聽見，可能我地見識少啦。一位學生就因為戴「綠勞」，誤交損友，家住新蒲崗，晚上應約到馬鞍山一個公園傾偈，仲要係晚上十一點㖭，博乜呀？父母點解唔阻止佢深夜出街呢？由新蒲崗去馬鞍山，好近咩？結果一去到公園，損友（17歲）已約定三名童黨持刀行劫，搶去「綠勞」，但細路仔打劫，手法業餘，好快就被警察擒獲。
中學生竟然見名貴手錶起貪心，設局引誘「朋友赴約」打劫，自然係世風日下，人心不古，但父母對兒子過份縱容，買十一萬元手錶畀個仔，又不理會佢在晚上睡覺時間出街，又係乜想法，木宰羊。李嘉誠都係戴一隻日本錶啫。香港貧富懸殊，人所共知，雖然事實如此，富翁富豪應該唔好周街表演「我有錢」，以免增加社會怨憤也。
另一單新聞則顯示中國內地受教育、長大嘅叻仔叻女，無論讀書點叻，頭腦仍然係衙門森嚴，唔好得罪嗰套，認為公安（警察）大晒，公安有無限權威，平民不能違抗，任公安魚肉。一位金融才俊自內地來港當分析員，收到電騙黨電話，冒認公安指控他涉嫌洗黑錢，於是就乖乖地將個人資料、銀行戶口資料畀假公安，同時呢批電騙黨又搵到一位理工大學內地女生，指佢涉及內地刑事案，要女生協助查案，上門向才俊遞上假拘捕令，男才俊收到拘捕令第二日先至懷疑有詐，查銀行戶口，713萬港元已經唔見咗，於是報警捉到女學生，但女學生亦係被騙嘅啫。
理大內地女生、金融分析員為何頭腦如此簡單？換轉係香港學生，大概會係第一時間報警啩！原因當然係內地人恒常以為公安大晒，唔敢出聲，容易上當，過往香港好多電騙案，受騙者大部份係內地移民、內地來港學生，即是內地匪徒專呃內地人，因為知道內地人普遍缺乏法治觀念，公安貪污屬常態。內地人即使人在香港，仍然未能領略到香港文化，即警察唔係大晒，警察唔可以收規！內地讀書叻仔叻女都係咁樣，教人如何相信內地有完善法治觀念？