警方經常聲稱社運現場有身穿黃背心嘅「假記者」出沒，更乘機修改警察通例下記者定義，排走晒過往影到唔少警暴嘅網媒同學生記者。噚日10.1再有網民發起街頭抗爭，唔單止防暴警都大舉出動戒備，仲有警察公共關係科（PPRB）嘅人扮電視台做直播，有網民即刻抽水問，呢個popo算唔算「假記者」呢？
popo成日話記者只影佢哋，唔影市民，可能因咁，噚日popo出咗好多人係銅鑼灣一帶拍片，連PPRB都派警員喺人來人往嘅街頭，揸住寫有「PPRB LIVE」嘅咪做直播，有人發現嗰位主播就係TVB前記者鄒昊亨，翻查資料，原來警方喺2017年都喺facebook公佈過鄒昊亨加入警隊。鄒昊亨單料一放上網有，有網民話係CCTVB做記者，最啱popo風格！網民就揶揄，唔知呢啲係咪就係警方口中嘅假記者呢。
講開popo，有網民噚日睇網上直播，見到有popo戴住印有「HK police」嘅口罩，有人話睇個樣好似政府供應嘅口罩，不過懲教署生產嘅口罩只會印「CSi」，唔知係咪又特別為popo整呢？
李八方