今屆歐聯分組賽嘅抽籤儀式，將會喺香港時間今晚11時舉行，衞冕嘅拜仁慕尼黑將聯同歐霸冠軍西維爾，以及六個聯賽冠軍球隊，包括英超利物浦、西甲皇家馬德里、意甲祖雲達斯、法甲巴黎聖日耳門、俄超辛尼特同埋葡超波圖，齊齊編入第一檔次成為種籽球隊。（歐洲足協官網uefa.com今晚11:00pm直播抽籤）
其中利物浦或有機會陷入死亡之組！事關其餘24支非種籽球隊，將按照UEFA嘅球會系數積分，劃分為三個不同級別嘅檔次，其中第二檔次有唔少勁旅，由於相同聯賽嘅球隊，分組賽唔會碰頭，所以2019年冠軍嘅利物浦，肯定唔會遇上三支英超隊曼城、曼聯同車路士，所以紅軍將會有高達40%嘅機會硬撼由美斯領軍嘅巴塞隆拿，或上屆喺16強淘汰佢哋嘅馬德里體育會！
同場UEFA將會上演頒獎禮，頒發年度最佳男女足球員等獎項，喺禮拜二UEFA仲提前公佈，前車路士傳奇杜奧巴當選本年度歐洲足協主席獎，並形容佢係數百萬球迷嘅英雄，足壇嘅領導者！