立法會選舉押後一年，對部份人嚟講未嘗唔係好事，事關今年候選人只要向選舉事務處申報開支就全數回水，唔少建制派選舉開支都相當驚人，好似專業動力方國珊短短兩日就使咗逾260萬、「希望聯盟」袁彌昌五日內申報用咗逾130萬，民建聯葛珮帆使咗近80萬，何君堯同三名藍營KOL合組嘅名單就花費逾57萬，全部由港人嘅血汗錢承擔，都咪話唔肉赤。
方國珊宣佈參選後即刻大灑銀紙喺選舉工程，宣傳物資好似擴音器、網上宣傳等用咗70萬 ，咁揼本唔怕冇得回水咩？原來哪吒背後有一班得力人士同專業動力支持佢超過200萬，唔怪得咁豪爽。
何君堯名單都花費唔少，30幾萬係競選廣告、20幾萬雜項入面包括咗買電工柄鉗、轉電插蘇、鋼絲鉗；自稱走中間路線嘅袁彌昌亦申報逾130萬開支，除咗豪花逾50萬喺代理人同選舉助理開支，佢亦舉辦九次選舉聚會、分別一次選舉講座同埋誓師大會，合共近四萬元。佢仲識食好西，申報四人到灣仔一間日式餐廳食咗超過2,600蚊：有民建聯撐腰嘅葛珮帆參選名單，選舉廣告開支成72萬，租金同辦公室等開支用咗近5萬蚊。
李八方