民主派去留與否塵埃落定，除咗陳淑莊決定唔留任，早前朱凱廸亦一早畀信立法會秘書處話唔會留低，但原來噚日19名民主派表明留任之日，亦正是朱凱廸43歲生日，議辦同事都同佢慶祝任期內最後一個喺立法會過嘅生日。
朱凱廸喺facebook發帖話睇到蛋糕上嘅「光榮失業」四字，心裏面其實有啲「戚戚然」，指疫情中失業者越嚟越多，大部份都惶惶不安，今日唔知聽日事，「我們有餘力的，只能多行一步，為他人分擔，令憂愁的得安慰」。
佢話雖然立法會准佢哋多留20日執嘢，但係同事們昨日都自發返office收拾，盡力喺10月1日前乾淨交吉，佢亦轉載陳淑莊嘅告別聲明，留言祝福同樣選擇離任兼退出公民黨嘅Tanya「保重」。
有好多網民留言祝佢生日快樂，有網民話雖然唔贊同佢離開立會，因為覺得留喺議會多一分力量都係好，但仍然支持佢，感謝佢為真香港人做嘅一切，又話不分化，希望香港人加油；仲有新西選民話，佢哋等緊朱凱廸日後重返議會，叫佢趁呢段時間好好照顧身心健康，又話佢今次休息，係為了日後走更遠嘅路。
李八方