一樣米養百樣人，雖然老闆都係人，不過老闆三個口，惡過官字兩個口。公司是老闆的，規矩是老闆定的，甚麼合理甚麼不合理，一切老闆說了算。打工仔有的，是選擇做抑或不做、打不打這份工的權利和自由。
只不過很多打工仔口裏說不，日怨夜怨，但意志非常堅定身體極度誠實，日日堅持繼續準時返工唔敢放工。還要諸多道理藉口為自己開脫，哪來的那麼多斯德哥爾摩症候群病患者？
看一看自己跟的是個點樣的老闆，就足夠作為下屬的你認清自己是個點樣的人。以下七種老細，大家自行按圖索驥對號入座。最終成為一個連自己都睇唔起自己的人，還是一個連自己都羨慕的人，自己睇路啦！
（1）個老細要樣樣完美樣樣啱，善於找錯處，跟得耐的下屬，多數姓賴，好叻找藉口，俗稱射波。
（2）個老細係控制狂，做下屬嘅一係欠信心，驚青不敢揸主意，成世上不了大台；一係hea做，反正老細改硬，老海鮮是這樣煉成的。
（3）個老細處事講關係人情，一切視乎friend唔friend而定，做下屬的還有甚麼原則可言，白鴿眼又勢利，是非當人情，周圍巴結。
（4）個老細鍾意睇馬騮戲，啲𡃁一定係演員，一哭二罵三上吊，做完雷雨做獅吼記，硬是要搞大龍鳳，入戲又死唔入戲一樣要死，老細不知睇得幾開心又放心。
（5）個老細四點零影都冇，去咗電髮，啲𡃁都有機會傾向貪公司文具廁紙。練精學懶貪威識食最鍾意搵着數，再加上上樑不正下樑歪，會有乜嘢結果毋須多講了吧？
（6）個老細好大喜功，成日驚大老細睇佢唔到，下屬自然投其所好，講到天下無敵假大空，搭台做騷得個樣，不會有心思做好內容。
（7）個老細少年得志語無倫次，跟得的下屬同樣聲大夾惡目中無人，樣樣巴之閉，乞人憎到暈。
張慧敏