民主派噚日公佈立法會議員去留民調，但最令人意外嘅唔係民主派決定留任，而係公民黨議員陳淑莊（Tanya）以個人及健康為由，宣佈退黨兼離開議會。消息一出，Tanya老友、主張民主派議員杯葛未來一年立法會嘅藝人杜汶澤，即喺facebook出po，宣佈Tanya以後可以聯絡返佢，更揚言：「如果唔係（退黨唔留任）？一世都唔使旨意我睬返妳呀！」
自言日日有追杜汶澤fb po嘅Tanya好快就留言話已經買咗飛，準備睇杜汶澤11月開Show，向來搞笑嘅阿澤就話，如果Tanya冇退黨，「買咗飛都入唔到（場）啊！」
向來愛恨分明嘅阿澤又話，做得佢朋友嘅人，雖然政見未必同佢一樣，甚至乎膠膠哋，但一定唔會係喺關鍵時刻出賣自己同香港人嘅「無恥之徒」，更加無可能做「走狗」，文中激動爆粗鬧決定留任一年嘅公民黨。同樣杯葛議會唔留任嘅人民力量陳志全都做路人甲，留言回應：「約食飯啦」。
慢必亦喺fb「重溫」同四眼陳嘅相識經過，話10年前因「五區公投」識到陳淑莊，佢當年都未參政，第一次為立法會選舉做義工就係畀咗Tanya，直言：We are proud of you for the decision！
李八方