早排體育、演藝、文化及出版界議員馬逢國提到業界因疫症失業情況時哽咽落淚，錯誤老屈政務司長張建宗叫業界要「識大體」，搞到要同張建宗say sorry，兩人噚日喺立法會財委會相遇，張建宗完全當冇事。不過張建宗佢咁大方，唔係所有建制都欣賞，好似人稱象哥嘅民建聯黃定光噚日就用粗口向張表達不滿，張建宗不單冇投訴，仲多謝佢！
噚日財委會傾抗疫基金撥款，馬逢國發言時話，早前已將業界困難充份表達，但至今有官員愛理不理，又話之前畀過21點建議政府，但政府至今只回應咗三、四項。上次被馬逢國老屈嘅張建宗，不但冇追究，仲話欣賞馬嘅努力，話如果馬提供嘅資料有根有據，識別機制又操作到嘅話，「我願意為你（馬逢國）奔走嘅」，更就此出咗一、兩封信，希望可以回應到要求。
到黃定光發言，當講到政府聲稱要請好多人先可以審查到真正需要受助嘅巿民，黃定光直情爆粗鬧：「平時佢哋（政府人員）食乜嘢啊，唔使做呀？吓？做多啲嘢就要請多啲人？如果我公司係咁，仆街啦真係！死人啦！」
黃定光爆粗惹來全場譁然，連佢都立即補鑊話唔好意思，換着爆粗係民主派議員，官員肯定立即投訴兼下令趕走，但張建宗竟然話：「好多謝黃議員語重心長。」仲話會鞭策自己做好啲！作為政務司長俾建制用粗口鬧仲可以講多謝，官員以後喺建制派面前，仲點可以抬起頭？
李八方