虎媽A去年到英國加拿大視察寄宿學校，為兒子選校，卒之決定讓兒子報考英國三間學校，唔選加拿大，佢個仔又夠晒叻，三間都話收，點知今年第一季就有大流行疫情，英國情況比香港更嚴重，虎媽A立即為兒子押後赴英升學，要求學校批准延遲一年入學，但有啲富有家長照樣如期赴英，幾十人包一架飛機去倫敦，再坐汽車到學校，呢日虎媽A來報：「好彩我個仔唔去啫，包機去嗰批已有人在倫敦驗到確診呀！」倫敦係高危地區，冇香港咁安全，主要原因係外國人因不同原因，拒絕戴口罩。星期四睇到一篇報導講美個侯斯頓循道醫院有研究報告，C19病毒已有基因變異至第三個品種（third strain），十分頑強，傳染性極高，難以滅絕。咁啱見到理學院學系教授H，問佢有乜辦法防止病毒，幾時有疫苗可保安全？教授H話：「戴口罩最隱陣，疫苗喎，邊會咁快，雖然中國話開發疫苗領先全球，但安全及穩定性我認為有疑問。嗱，如果習近平打咗針先，我就跟住去打嘞！」
講笑咩，習近平有無打疫苗，乃國家機密，凡人怎麼會知道？俄羅斯比較透明啲噃，俄媒報導普京一位千金已接種疫苗，係唔係可以信賴呢？教授H話：「俄羅斯特務放毒最叻，世界聞名，但俄羅斯製造嘅藥物與疫苗得唔得，我就唔敢講嘞。」
講來講去，科學家只信美英德三國發明及測試過嘅疫苗，其他一概得個睇字，佢地有無偏見唔敢講，教授H話講多啲可能會畀藍絲批鬥。
藍絲有一個大毛病就係不思考，只信內地文宣，迷信邊一個國家有示威，一定係CIA在背後搞鬼！譬如呢個禮拜，藍絲WhatsApp群組廣推一篇內容農場嘅五毛作文，就係美國勢力教唆泰國學校抄香港黃之鋒嗰一套，在泰國搞運動，背後有美國推手。人地泰國大學生中學生示威，爭取民主，關香港藍絲鬼事咩，點解要夾硬同香港扯上關係，指美國人係煽動者？泰國大學生搞示威，歷史悠久，自1973年至今，已有幾次大流血，依家反抗軍政府，使乜外人指導？藍絲唔認識泰國，收聲唔講冇人話佢地啞嘅啫，唔通佢地因為太過崇拜威權，擁護埋揮金如土，擁美女在德國豪華酒店狂歡而不回國抗疫，與人民共渡時艱嘅泰皇？