中秋未至，坊間已見來年的運程書應市。風水業界看來甚手緊，命理呢瓣同行如敵國，明年經濟更艱難，本書一百蚊有找亦未必銷得，還是早賣早享受吧。今年中秋月餅冇自由行帶水貨，滯銷唔使審，一直向獄友寄月餅的傳統，今年與立法會選舉一樣，被惡意褫奪，獄友失望，餅家絕望。一環扣一環，不如買月餅送風水書，一家便宜兩家着，自救唔等上帝感召嘛。喔，上帝唔奔月，內地大學出版職業教育教材，厲害了，比鄭月娥的「不吐不快」膽自大，比半個紅衛兵的楊焗腸更有擔當，將「若望福音」中耶穌「憐憫淫婦」事跡竄改，耶穌唔講耶穌，動手向犯了罪的婦人擲石，殺人後自稱「我同樣是個罪人，但如果法律只能由毫無瑕疵的人執行，法律就只會死亡。」香港教區署理樞機湯漢，訓斥教友支持暴力分化教會，明顯認同殘體字的福音，高調俾like，亞孟。谷住條氣自覺被特首與陳同佳當做condom的管牧師，唔同諗法，該不會被內地教材激發，拿起石頭……？岳飛被天主召叫，嫦娥被貶淫婦等住做「望后石」，順民無眼睇還是應節切月餅吧。湊巧內地公安偵破化糞池旁邊生產的老翻蓮蓉月（準備隨盒附送健康碼未？）忍無可忍喪鬧泛民的張建宗，今次講中咗：國家嘅嘢，冚唪唥都唔用得！