上禮拜六英超愛華頓作客鬥水晶宮，因為賽前兩隊同樣喺聯賽兩戰全勝，所以呢場可以話係榜首大戰。愛華頓呢場開賽10分鐘，就有卡維特利雲攻入今季聯賽第五個入球幫球隊先開紀錄，不過之後喺26分鐘，水晶宮借住一次角球攻勢，由高耶迪入波幫球隊追成平手。完半場前八分鐘水晶宮嘅祖爾禾特喺禁區犯咗手球，俾球證判罰12碼，李察利臣操刀一射破網，拖肥半場以2:1領先。
換邊之後水晶宮利用高空攻勢同死球戰術狂轟猛炸，可惜最後都係冇辦法收復失地，最終愛華頓以2:1贏波，計埋兩場英聯盃勝仗，拖肥更加係繼1938年後首次錄得開季5連勝。
至於尾場就有「聖人」修咸頓面對揭幕戰失利嘅般尼，上季神射手榜同奧巴美揚並列第二嘅丹尼艾格斯，開賽五分鐘就接應查阿當斯嘅傳送門前建功，幫修咸頓早早就領先1:0。其後雙方各有一球詐糊波，再無進賬之下「聖人」結果小勝般尼1:0，攞到今季英超第一場勝仗。