之前英國保守黨人權委員會成員裴倫德（Luke de Pulford）發現中國駐英大使劉曉明Twitter like咗條色情影片，之後又like咗一則要求中國就「武漢病毒」認罪留言。中國駐英大使館梗係唔認手多like錯，例牌話因為黑客同反華勢力惡搞，可能因為咁，劉曉明Twitter賬號日前封鎖流亡海外嘅羅冠聰，唔知係咪怕錯手like咗羅冠聰嘅文，到時又唔知點解釋？
羅冠聰喺fb貼咗自己被劉曉明封鎖嘅截圖，仲貼文寸對方，「到底中國駐英大使劉曉明在害怕些甚麼？是害怕像上次色情短片一樣錯誤地轉發我的帖文嗎？」之後再加一堆hashtag：#轉發色情短片又怪客盜用你的賬戶、#其實中國才是擁有最大黑客軍、#不如返回微博單機、#不能連上自由網路的國家不配用Twitter等等，擺明恥笑劉曉明又要學人玩Twitter，但又玻璃心兼成日like咗唔應該like嘅野。
有網民留言話，劉曉明好小器，佢有次留言笑吓都俾劉曉明block咗，反而華春瑩好少block人！又有網民話，咁唔想見到反對意見，劉曉明不如返去玩微博，直接簡單取消Twitter戶口咪得囉！
李八方