隔牆有耳：社署派膠　攞你命三千（李八方）

政府成日提出源頭減廢，不過好多時政府派出嘅紀念品，都令人哭笑不得。IT界立法會議員莫乃光最近收到社署「三色螢光筆」，忍唔住喺fb形容係最不切實際、最唔環保、最白癡嘅紀念品。

「幾多人真係會用？」

呢款三色螢光筆手掌咁大，唔方便之餘，拎上手畫直線都幾考工夫。莫乃光質疑「有幾多人攞咗真係會用，有幾多人即刻會揼落垃圾桶？」今時今日使呢筆錢派膠做宣傳，倒不如將筆買網上廣告好過，總結就係一個字蠢。

八方上網搵過，同款螢光筆唔平，訂購1,000個每個都要$6.2。網友精明過社署，提議用嚟做杯墊，或者開晒啲蓋做飛鏢。

講咗咁耐，到底宣傳咩呢？原來係叫市民「做個精明捐獻者」，同一句口號2011年都有用，用足九年，一成不變。