【本報訊】中秋節這個本是人月兩團圓的日子，過去三年如同潘家禁忌，潘媽媽哭訴不只中秋節，連其他節日已沒再慶祝，她說「豬豬」（曉穎的乳名）在生時「每年中秋一家人一定會與老人家食晚飯，之後帶埋燈籠、月餅同生果去公園賞月，豬豬細個時最鍾意點燈籠、蠟燭、拋螢光棒。」可惜一家人齊齊整整慶團圓的情景已成絕響，也成為潘爸爸及潘媽媽心靈永不磨滅的傷口。
曉穎生前是家中開心果，父母的掌上明珠，潘媽媽仍難忘女兒的一切，「佢話大個做嘢，一定要買間好大好大嘅屋畀我哋，請兩個工人服侍我哋，但𠵱家乜都冇啦！」潘媽媽結婚多年後才懷孕誕下曉穎，得來不易的女兒孝順、乖巧 、聰明，令她十分安慰。
因父親工作較忙，母女關係相對密切。小時候，潘媽媽每晚講故事和唱歌哄女兒入睡，曉穎愛去海洋公園鯊魚館及掟公仔，長大後愛去迪士尼樂園，潘媽媽都陪伴在旁，難得是女兒長大後亦會跟她分享心事，「講佢學校啲威水嘢。」有一年學校畢業禮，曉穎幾經辛苦取得兩張門票讓父母入場，拿着獎項的曉穎，事後信心滿滿對父母說：「『呢啲小兒科，大學仲叻』，可惜睇唔到佢大學畢業禮。」
