熱刺喺周四嘅歐霸盃第三圈外圍賽，靠近況大勇嘅孫興民交出1入球2助攻，以3:1擊敗北馬其頓球隊舒肯迪捷。有趣係熱刺喺賽前發現球場入面所設嘅龍門框唔合規格，好似縮咗水咁，領隊摩連奴仲走埋去伸長隻手度一度，發現真係唔妥，最後就要求歐洲足協（UEFA）換番個正常尺吋門框，事件先告一段落。不過，由於今場比賽場地並唔係舒肯迪捷嘅主場，相信都唔係主隊有心「出貓」嘅。另一方面，熱刺原本喺星期二嘅英聯盃第三圈對英乙球隊奧連特，不過對手日前就有多位球員被驗出患上武漢肺炎，因此賽會周五裁定奧連特未能出賽，令熱刺可以自動晉級，將會喺下星期二嘅第四圈硬撼車路士。至於AC米蘭（紅黑衫）雖然有伊巴謙莫域中咗武漢肺炎缺陣，但同日依然喺歐霸外以3:2險勝挪威嘅波杜基林特晉級。