【名家足路】
【對決場次︰白禮頓vs曼聯】
上星期熱捧利物浦拆「車」成功破燈，連帶英超大勢推介嘅愛華頓同列斯聯都順利命中，似乎接近9月尾快可擺脫「燈神」呢個污名，今個禮拜乘勝追擊，一於推介曼聯上盤畀大家！
曼聯開季第一場就爆冷輸畀水晶宮，不過對手比佢哋踢多兩場正式比賽，論狀態曼聯梗係有啲輸蝕。但周中英聯盃，紅魔鬼即刻作客淨勝三球，雖然對手只係英冠嘅盧頓，但門將甸恩軒達臣同中堅艾歷拜利表現獲好評，隨時有機會搶走正選；就算佢哋要繼續做後備，相信都可以為首仗表現麻麻嘅迪基亞同埋罪人域陀連迪路夫帶嚟一定嘅壓力，再冇好表現嘅話隨時失去正選，相信曼聯今場防線肯定有所改善。
進攻上曼聯球員始終有質素，三名星級中場波基斯費南迪斯、保羅普巴同雲迪碧克有入球同創造能力，安東尼馬迪爾、拉舒福特同格連活特把握力都強。上季，曼聯就成功雙殺白禮頓，兩個月前佢哋仲作客淨勝三球，實力上贏晒喇！白禮頓呢支護級分子，開季首戰主場1:3輸畀未磨合嘅車路士，睇唔出佢哋有乜爆冷本錢。
曼聯就話晒都係堂堂英超頂級球會，冇理由開季連續兩場對住弱旅都贏唔到嘅，事關佢哋今場再失分，隨時有機會跌落降班區㗎，雖然只係啱啱開季，但利物浦、阿仙奴等競爭對手都順利彈出，曼聯冇理由咁失威，畀機會英媒笑佢哋，曼聯今仗讓半/一，一於捧上盤撐佢哋贏波反彈喇！
《一燈決》係今季新欄目，由上月擂台盟主同上月燈神拗吓頸，睇吓讀者信邊個。
文︰尊嘉