上季大熱捧走歐聯嘅拜仁慕尼黑，周四同歐霸盃盟主西維爾會師歐超盃，兩隊喺法定時間踢成1:1，但拜仁喺加時靠後備入替嘅查維馬天尼斯入波，最終喺匈牙利中立場入座嘅兩萬球迷面前，以2:1力挫對方奪得今年內第4座錦標。至於輸波嘅西維爾就比較慘情，皆因連埋今次，球隊對上五次以歐霸盃冠軍身份出戰歐超盃，最後都係空手而回。
今場開賽13分鐘，西維爾就先靠奧甘波斯射入12碼領先，不過拜仁34分鐘就有哥列斯卡幫手追和，但換邊後食咗兩次詐糊，令兩隊要打加時，最後靠「查馬」喺加時上半場完結前頭槌頂入，贏2:1捧盃。
上季歐聯決賽，拜仁就靠平時唔多入波嘅京士利高文一錘定音，以1:0小勝巴黎聖日耳門捧盃，今次就輪到有傳準備走人嘅查馬做奇兵。查馬對上一次幫拜仁入波已經係上年4月嘅事，對於隔咗一年有多再幫拜仁入波，查馬就話一直想幫拜仁獻盡全力，呢日就顯示到就算上陣10至15分鐘，都可以幫到球隊。
其實今次已經係查馬第二次喺歐超盃加時建功，七年前就係對住車路士，又係佢去到加時最後一分鐘入波，追和對手2:2，最後靠互射12碼助拜仁奪冠，所以賽後就連隊友湯馬士梅拿都稱佢係「歐超盃先生」。至於拜仁教練費歷克亦大讚呢位一年後就約滿嘅中場：「佢攻入一球幫我哋贏波，有時候足球世界就會有呢種美麗故事。之前有報道話佢已經加盟畢爾包，但係今場佢仲幫我哋入到波。」除咗查馬，今場喺87分鐘撲走安尼斯利單刀波嘅門將紐亞，賽後就獲對手拿傑迪錫盛讚佢先係拜仁捧盃功臣：「今晚可以睇到紐亞對拜仁幾重要，本來我哋有兩次機會入波，但都俾佢化解晒。」
另外，歐洲足協同日宣佈因武肺影響，今季歐聯、歐霸盃、女子歐聯、歐國聯同歐國盃外圍賽附加賽等都會繼續保留每隊每場換五人嘅名額，但英超之前就因為中下游球隊反對，冇跟隨呢個做法。
