香港人的自由及權利，近年越縮越少，唱作歌手梁嘉茵（Serrini）的作品，因貼地獲不少年輕人熱捧，歌曲的點擊高達30多萬，她坦言音樂自由同樣重要。作為創作人，Serrini亦希望香港音樂界可以團結集合起來，想出方法捍衞音樂自由，至於自己暫時未算太過害怕，依然堅持：「想寫乜就乜！」
撰文：寶妮
現年30歲的梁嘉茵在過去九個多月跟大部份香港人一樣，留家抗疫，她亦正好趁這段時間瞓身創作。Serrini日前在西環的錄音室接受《蘋果》專訪，她稱年輕時也鍾意跳舞音樂：「但大個好似冇咗，唔記得點郁個身，最近同朋友整一系列嘅跳舞歌，用電子及數字表達出嚟。」
近年不少本地的創作人，指香港的創作自由及空間越縮越細，甚至被法例所限制，Serrini有否同感？她謂：「我好鍾意Taylor Swift同Lady GaGa，唔知會唔會因為咁而入唔到嚟演出？呢樣最擔心，我唔擔心自己，我用念力、正能量希望個社會有改變。不過作為創作人唔會諗咁多，想寫乜就寫，返學校開會會講學術同言論自由，音樂自由都好重要，好希望音樂界嘅人士出嚟一齊開會睇吓點搞。」
做唱作人多年，有否被人潑冷水？十足大笑姑婆的Serrini笑說：「冇人理我，我都唔重要，人哋嘅冷言冷言，我有個filter。」她曾在中大讀學士及港大讀碩士，父母會否怕她專注音樂，而影響學業及浪費金錢？Serrini說：「佢哋自小放棄咗我，唔可以強求我做醫生或律師，父母只要我好好搵份工，唔好紋身就得。」有否一刻曾想過好難，放棄做唱作人？Serrini自言付出的代價太小，只像去做facial，加上很享受創作及唱歌，是生活中的調劑，故從未想過放棄。
現今Serrini出歌及拍MV，大部份資金都是來自她本人，會否有一定困難？她坦言：「拍MV真係好貴，因要專業人士，資金都係自己同眾籌，當然仲有父母，食飯唔使我畀錢都當佢哋投資，如果真係要拍嘢我就唔去gel甲。」若簽大公司便有「大水喉」不用擔心出歌資源，但Serrini稱暫時未有大公司找她合作：「我唔係一個咁重要嘅人，唔覺自己有幾特別，當然我都想有人搵我合作。」但不少大公司因商業考慮會限制歌手創作自由，她說：「如果金錢合理係冇問題，可以妥協，或者佢哋要我先減肥。」
場地提供：19hz Studio
