【拆局】西環向建制派下動員令外洩，雖然建制派企圖淡化、甚至否認中聯辦想以此動員打倒司法、教育及社福「三座大山」，但有民主派中人分析，事件已證明中聯辦已將「三座大山」定為鬥爭目標，「未來喺輿論、立法會層面將全方位圍攻」，又指北京會「逐少逐少咁侵蝕，到佢覺得食到差不多，就出重手消滅」。
該民主派人士指，何君堯變相將中聯辦行動計劃公開，「內容唔重要、邊啲係西環、邊啲係建制意見都唔重要，重要係暴露西環戰略目標要打倒司法、教育及社福界」，他說北京定下戰略目標，就會全方位行動，「快慢唔係關鍵，佢哋策略定咗就一定做，可以逐少逐少咁侵蝕，一次唔成功就兩次、三次咁做」。
原本這種手法要成功，首要是降低市民戒心，「以為只係個別左派意見，唔代表北京真係想咁做」，但現在何君堯將中聯辦與建制派密會內容外洩，連打倒「三座大山」目標也公開，「咁等同暴露係西環策動、角色，市民戒心會加大，要打倒三座大山難度自然上升」，笑言何君堯完美示範何謂「豬隊友」。
該民主派人士又指出，對建制派而言，日後他們對司法、教育及社福界有任何批評，也必被視為替中聯辦作「打手」，「建制派一向寧畀人知莫畀人見，今次俾何君堯搞到見晒光，恐怕好多一向扮對事唔對人、客觀嘅建制派一定嬲到震」。