【本報訊】網媒及學生媒體在反修例運動期間走在最前線，拍攝到不少獨家警暴片段，結果成為警方針對對象，處處刁難辱罵。有網媒記者最近於灣仔採訪時，一日內被警方搜查五次；有學生記者因被指「靠得太埋」，即被警方以胡椒噴霧「招呼」，並向他們濫發限聚令告票。
獨家拍到9月6日12歲女童在旺角被多名防暴警撲倒地上的科大電台記者、工程系三年級生Sam表示，8.31一周年當晚，他與另一科大記者被警方發出599G限聚令告票，「佢哋（警方）嗰陣同我講話忍咗你哋好耐，俾人票控完快啲返屋企。我覺得佢個語氣或意思，就係想我哋唔好再出嚟採訪」。學生記者資源有限，「𠵱家打算抗辯，一嚟冇錢交，二嚟我哋真係採訪緊，唔應該收到告票」。
另一科大電台記者、工程系二年級生Vanessa指出，他們採訪遇到的困難甚至比主流媒體更多，「佢哋（警察）會用啲physical嘅方式阻住我哋，甚至，當記者靠得太埋嘅時候，佢會即刻開胡椒噴霧噴我哋。近排喺現場佢哋會拉封鎖線，我哋非主流嘅就要俾截查、check身份證，之後再搜身，先放你走」。
去年11月於西灣河獨家拍到交通警開槍射擊21歲青年而響名堂的網媒「丘品新聞」，其記者Leo便經常被警察截查搜身，「最高紀錄試過一日喺灣仔俾警方搜咗五次，每行一個街口就搜一次」，更會出言侮辱，「曾經俾啲差佬用『螢光曱甴』去形容我哋」，他自此拒絕穿記者反光衣。
丘品新聞另一記者Savannah曾目擊同事無理被警方截查逾一小時，「佢嗰時係被要求打電話返公司，要求僱主提供職位證明，要send份合約展示畀警方睇，然後先放人，截查期間仲問佢點解入我哋公司做，又叫佢揀好啲、揀好間公司嚟做」。