香港警察喺社交媒體動作多多，最近就喺facebook專頁出咗張meme圖，本來好地地教人慎防電話騙案，但就懶幽默咁將「蘋果」掟落街。無獨有偶，粒蘋果造型同《蘋果日報》logo非常相似，似乎影射緊要將《蘋果》掟落街！
講返呢張meme圖，原意係一班生果喺度討論電騙，提子問大家「如果父母收到假冒內地官員電話，點做？」然後橙同埋士多啤梨就話要「收線」，淨係得蘋果講咗句唔啱聽嘅「由得佢俾人呃」，最後蘋果嘅下場就係被掟落街。對待唔啱聽嘅聲音，原來就要掟人落街，警察鼓吹暴力行為，又算唔算煽動仇恨呢？
呢個小學雞式文宣網民唔多受落，大批網民留言恥笑警方借文宣終於肯承認想殺蘋果，同埋最叻掉人落街，亦有網民讚差人「誠實」：「難得誠實一次喎！搞唔掂就掟人落街」，「香港警察做事真的光明磊落！毫不掩飾直接說把人從高處掉下！男子漢！難怪這一年多那麼多人被警察扔下來死亡警察也說沒可疑」。身為紀律部隊，居然喺網上鼓吹暴力，成日話「與暴力割席」嘅特區政府今次唔知點睇警察教壞細路喇。
李八方