周日羅馬喺意甲開鑼戰作客同維羅納打成0:0，原本各得一分，不過，周二意甲賽會宣佈，由於羅馬派遣咗未有喺一隊註冊嘅中場阿馬度迪亞華拉上場，被判罰輸0:3。當日羅馬安排咗迪亞華拉正選上陣，呢位幾內亞球員仍然喺U22名單上註冊，不過，由於佢今年7月年滿23歲，已經唔能夠再喺U22名單註冊，但羅馬又未有為佢喺一隊名單上註冊，變相根本冇資格為羅馬上陣。據報，羅馬堅稱佢哋曾經聯絡過賽會，仲被告知話呢個係技術錯誤，唔使擔心咁話。不過，賽會亦表示佢哋已經通知羅馬．要將阿馬度迪亞華拉註冊喺適當嘅名單，否則就唔可以上場。有指羅馬秘書長Pantaleo Longo已就事件提出呈辭。