近兩星期前法甲巴黎聖日耳門（PSG）主場0:1不敵馬賽嘅比賽，巴西球星尼馬因為用手拍馬賽後衞艾華路蘇比朗後腦而領紅，被罰停賽兩場。不過事件繼續發酵，西班牙傳媒指尼馬聲稱自己被艾華路蘇比朗嘲笑係馬騮，但原來佢都唔係好人，先辱罵艾華路蘇比朗係同性戀，再中日不分去鬧日本球員酒井宏樹係「中國狗屎」，激嬲晒一眾玻璃心。《阿斯報》報道，呢啲種族歧視嘅行為會再被各判罰停賽10場，加埋成20場，不過據指現實情況最有可能係尼馬會被罰停賽8至10場。法甲賽會嘅最終裁決預計會喺未來兩星期公佈，不過如果真係禁賽20場嘅話，尼馬最快要去到下年2月先可以再喺法甲賽場上出現，對PSG嘅影響將會係非常大。