英國傳媒報道，由於英超賽會喺賽程安排上刻意遷就本土球迷，惹起包括來自香港、新加坡同泰國嘅亞洲地區轉播商不滿，考慮因此要求退款，各家英超球會隨時面臨數以千萬鎊嘅經濟損失。《每日郵報》指，部份亞洲轉播商對英超喺9月份嘅大部份球賽（圖），都喺當地時間晚上舉行好不滿，仲話若然有關安排一直延續，就會要求退還部份轉播費用。亞洲地區電視市場係英超嘅一大收入來源，英超每年高達12億鎊嘅海外轉播收益當中，就有大約四億鎊係嚟自亞洲，單係香港、新加坡、泰國、馬來西亞同印度等地，每年就要向賽會支付3.3億鎊嘅轉播費用，如果球賽安排喺亞洲地區嘅凌晨時份進行嘅話，就大大減低商業效益。