【姐匙Talk】敏敏怪行為抗拒直接溝通

以前市道興旺時，都有唔少品牌喺香港搞fashion show，好多local名模都幾吃香，可以接時尚品牌、珠寶首飾騷，又或者拍商品廣告，較次級model都接到唔少品牌喺商場做嘅event，不過近年市道真係麻麻，唔好話𡃁模冇乜嘢做，連名模都一樣食緊穀種，好彩嘅一早嫁咗人，生埋小朋友，相夫教子，間中post相上Ig晒幸福，生活簡單又寫意。

最近Jessie同時裝界行內人傾開市道唔好，模界好多人都呻冇工開，講講吓就提到已經結婚生仔半退休嘅「敏敏」，原來佢有個好有趣嘅癖好，就係唔會直接同陌生人對話。

裝修搵第三者傳話

試過有次一位裝修師傅接order上敏敏屋企做簡單嘅工程，裝修師傅上到去，就直接問客人想點做，點知敏敏就搵咗個人傳話，當住裝修師傅面前，向朋友講：「你同佢講我想……咁啦！」裝修師傅聽完有問題提出，當然直接問返佢本人啦！點知敏敏聽完又唔係直接答人，而係繼續同朋友講：「你再同佢講我要……咁啦！」裝修師傅當時個樣係100個問號掛喺面上，一路開工一路口噏噏，可能覺得遇到怪人，成個過程好似拍緊喜劇咁，但又真係喺現實中出現。

撰文：Jessie

本欄逢周三刊出

姐匙Talk

我姐匙縱橫歌影視幕後，多年冷眼旁觀，娛樂圈大小事都走唔過我雙眼，歡迎大家剝花生。