選舉事務處陸續公開部份參選人選舉開支，八方發現代表建制出戰資訊科技界嘅網上烹飪平台DayDayCook（日日煮）創辦人朱嘉盈喺冇選舉捐贈下，豪花51.5萬元作選舉開支，其中有28萬元花喺選舉工程費用上。冇人捐贈都咁有財力，話佢冇後台有冇人信？
選舉攞唔到第一唔緊要，選舉開支攞返咪得囉。自言「林鄭係我人生榜樣」嘅朱小姐喺候選人選舉開支上，費用之高數一數二。喺申報中，佢攞咗超過50萬做選舉開支，而喺選舉工程費用上，前後三次化妝、set頭用咗成3萬蚊。朱小姐仲搵咗一間名為飛昇嘅製作公司，幫佢設計網頁同做宣傳，盛惠27.4萬元。
不過，唔係個個候選人都好似佢咁大使，同樣參選資訊科技界嘅數據工程師馮振華就好慳家，只係花咗60蚊咁大把用嚟影相，二人嘅選舉開支使費相差超過8,000倍，連建制派第一大黨民建聯何俊賢嘅選舉開支都唔夠朱小姐多，佢只係使咗2.7萬。
李八方