喺外國人眼中，中國人同日本人真係咁難分？話說喺上個禮拜日場法國國家打吡，巴黎聖日耳門（PSG）同馬賽球員大打出手引起好大風波，巴西球星尼馬因用手掌打馬賽後衞艾華路蘇比朗後腦領紅，事後尼馬就話自己係俾人種族歧視在先，但馬賽方面就話有最新發現，自稱「受害者」嘅尼馬喺比賽期間，曾經鬧過日本國腳酒井宏樹係「中國狗屎」（Chinese s***），之不過佢今次就真係瘀爆，大佬呀，酒井係日本人嚟㗎！
上周日呢場激戰，2隊共有5名球員被逐，最終PSG輸0:1全失3分，領紅嘅尼馬仲俾法甲賽會判罰停賽兩場，不過由於尼馬賽後投訴，話自己受到種族歧視，聲稱俾人鬧佢係「混蛋猴子」，仲話好後悔冇一拳打落艾華路蘇比朗塊面㖭！不過早前已經有西班牙傳媒踢爆，尼馬早喺上半場就稱呼蘇比朗係「同性戀者」，雙方各執一詞。
結果法甲賽會就對事件展開調查，艾華路蘇比朗唔認相關指控，禮拜日三個唇語專家就話，蘇比朗的確有叫尼馬做「猴子」。不過時間去到禮拜二就再有西班牙傳媒爆料，自稱受種族歧視嘅尼馬，其實喺比賽期間曾鬧日本國腳酒井宏樹係「中國狗屎」，有唔少法國同日本行家都轉載咗相關報道。不過據報今次單嘢之所以被揭發，係因為法甲賽會介入調查後，馬賽方面亦開始搵證據幫球員辯護，結果馬賽就喺一啲比賽片段入面，發現尼馬曾疑似襲擊酒井宏樹，仲要「中日不分」鬧對方係「中國狗屎」，馬賽希望藉此反擊自稱係種族歧視「受害者」嘅尼馬，其實亦都其身不正！
不過，中國人同日本人咁難認咩？明明今季自從武磊陪愛斯賓奴降班西乙之後，已經冇中國球員有能力喺五大聯賽立足喇喎，日本國腳酒井宏樹大大話話都喺法甲踢咗成四年波喇！睇嚟尼馬下次鬧人都真係要先做定功課，唔係架就自己丟喇！
事實上，尼馬經常喺球場上俾人鬧佢扮嘢，包括輸波後又經常喺球場喊，今次出手打完人後，先至話投訴對方種族歧視佢，似乎又係想將自己塑造成苦主。如果佢鬧酒井宏樹單嘢屬實，尼馬嘅面具唔只會俾人拆穿，隨時仲會停賽多幾場，甚至惹禍上身激嬲一班小粉紅，對於季初已經不斷失分、近年積極開拓中國市場嘅PSG嚟講，認真係一個不利消息。