睇「天能」如果不想燒腦，可以自然呆hea問，點解大奸角那個俄國富豪咁陰毒，一定要親手毀滅全人類。順住劇情估到，俄佬與香港富商一樣，雖然有銀用，但眾叛親離，老婆兒子唔親佢，有銀有屁用咩。俄佬跟親共富豪同樣出身貧賤，靠做dirty job起家，底氣不足，跟官二代紅二代階級有別，自卑到爆，自不待言。香港有錢佬，是一大堆俄佬的翻版，爭住落頭版廣告聯署撐国安法那些，就算讓他們逆行，回到2019年一月未送中的現場，都會一樣咁柒。
俄佬被老婆踢爆，知悉罹患胰臟癌絕症，把心一橫要全世界陪葬。哦，戲院鴉雀無聲，觀眾是否聯想到偉大領袖中，有邊位與戲中俄佬屬於同病相憐？金仔對號，金仔兩位死黨會否入座？庚子武肺令不少國家領導中招，印堂發黑的，「金握手」那兩位未致排頭位，最黑那個，首推特區鄭市長，攬炒黑后，當之無愧。俄佬不管妻兒死活，777亦不准別人提起三仔爺。「天能」搵戲來做，鄭市長卻認定自己是「主角」，倒行逆施，彈出彈入，處心積慮毀滅年輕人的未來。國家隊替她撩鼻插喉，嘥氣。不用照肺都知佢，心腸死壞。