AC米蘭喺禮拜一場意甲主場，憑老將伊巴謙莫域梅開二度，主場以2:0擊敗最終只得10人應戰嘅博洛尼亞，打響頭炮。上半場35分鐘，伊巴謙莫域一次頭槌攻門，為AC米蘭打破僵局。踢到50分鐘，伊斯美賓拿沙喺博洛尼亞禁區俾柯蘇連尼侵犯，主裁判諮詢VAR球證意見後判罰12碼，伊巴謙莫域主射直轟右上角入網，為主隊將比分拉開至2:0。呢位瑞典老將之後喺一次攻勢扭過對方門將後起左腳可惜射斜，未能完成「帽子戲法」，但對賽果冇影響，AC米蘭最終以2:0勝出，保住自3月8日以嚟喺各項賽事不敗之身。賽後伊巴話：「如果我得20歲，今場應該可以攻入四球，但我已經39歲，唔係，係38歲，所以剩係入得兩球。」