巴塞隆拿前鋒蘇亞雷斯近日轉投祖雲達斯失敗，有指佢為離開巴塞，願意放棄剩番一年合約嘅部份人工，方便解約後轉投馬德里體育會，但主席巴杜美就緊急煞停阿蘇嘅交易，唔想阿蘇「零成本」過檔競爭對手；假如簽唔到阿蘇，馬體會就傳會改簽家陣自由身嘅阿蘇烏拉圭同鄉卡雲尼。至於阿蘇，周二有消息話佢為咗攞意大利簽證去祖記踢波，早前去佩魯賈應考B1級意大利語考試嗰陣竟爆出貓之嫌，有指佢一早收到風考試會出咩問題，驚動意大利警方介入調查，仲話有錄音對話內容作為證據。唔知係咪早知道出貓一事，祖記先放棄簽阿蘇，轉而搵踢緊馬體會嘅艾華路莫拉達回巢。呢位過去曾踢過祖記兩季嘅西班牙前鋒，以1,000萬歐元外借費，繼2014至16兩季後，再次加盟呢支意甲班霸。莫拉達禮拜一已飛抵都靈準備傾合約同體測，搞到今次前鋒大執位真係七國咁亂。