【12港人扣內地31日】
【本報訊】 12名港人疑潛逃台灣遭公安拘留至今已一個月，各人仍杳無音訊，而家屬收到的消息卻一個比一個差，其中一名失蹤港人李子賢的父母，昨接受傳媒訪問求援。子賢母親坦言，每當想起兒子出走前突要求合照，就感到牽腸掛肚，她認為兒子太愛香港，結果選了一條難行的路；子賢父親直言看不到「陽光司法」，連半點人權也沒有，亦印證為何去年港人反對送中條例。
涉嫌偷越邊境被內地刑事拘留的12名港人，按內地法律，最長可被羈押37天，若檢察院不批准逮捕，公安局須在10月1日、亦即今年中秋節前批准12名港人取保候審，或者無罪釋放。港台昨播出其中一名被拘留人士、29歲測量員李子賢父母專訪。李父坦言至今仍未消化子賢失蹤，壓力大得要看心理醫生和服藥，「精神壓力太大，無法入睡，又食唔到乜滯」、「坐低食嘢就會諗起個仔，喺嗰度（看守所）唔知有冇得食。」
子賢母親不時憶起兒子失蹤前數天，突然與她合照，「佢不嬲都唔係主動影相嘅人，當下冇諗到唔尋常」，她當時並不為意，還開玩笑說：「做咩呀，無啦啦同媽咪影相。」現在卻無時無刻想起當時情景，令她難以入睡，「瞓吓醒吓，有時候醒吓check返啲新聞，有冇啲咩可以更新返。」
子賢是家中獨子，牽涉去年9月在金鐘參與暴動和襲警，作為母親，一想起兒子遭遇便覺心酸，「點解一個咁乖嘅小朋友，搞到今時今日咁？」她說兒子只是「好多唔公平嘅事，佢睇唔過眼，以前香港唔係咁㗎，點解𠵱家黑白調轉晒嘅？」她認為兒子遭遇可能父母有責任，「但社會都有責任」，「𠵱家唔係一兩個年輕人嘅遭遇，整代香港年輕人都生活得好辛苦」，所以她曾建議兒子移民，子賢卻反問：「點解要移民？我喺度出世，香港係我哋㗎，點解我哋要走呀？」
Stand with Hong Kong的IG昨貼出子賢母親信件，她在信首已說：「媽咪好掛住你呀，你幾時返嚟呀？」又形容子賢「太大愛，吓吓都諗人，有時我真係想你自私啲諗吓自己」，多年前子賢哭着說「香港無喇！香港玩完喇！」那時她已知「你選擇呢條路係好難行」，但她仍支持子賢，「無論將來如何，你都係我嘅寶貝仔，媽咪以你為榮」，更直言每天也對自己說要堅強，「呀仔等我救，唔可以跌低，只要向前行，希望可以快啲救你番嚟。」
至於子賢父親，則為兒子奔走問過很多內地律師，但很多人也不肯接手案件，而子賢父親堅拒官派律師，好不容易終於找到律師，但律師至今未見到子賢。對內地宣稱「陽光司法」，作為父親有很深體會：「內地司法完全冇透明，我唔覺得係陽光司法，連少少人權都冇。有咩體會？啲後生嘅想法證實咗，（送中）發生起嚟真係要反對囉。」
以往中秋節即使子賢約了朋友，也會先在家中與父母食飯，今年中秋兒子仍未見歸期，父母只能寄出明信片，希望愛兒見字可以慰藉。子賢父親自言「年紀有返咁上下」，「希望有生之年可以坐埋同一枱食飯。最緊要佢堅持落去，捱過面前難關」，作為子賢母親，她直言要堅強，今年中秋她只想向子賢說：「媽咪好愛你，已經夠了呢句。」