每個人都會有情感的禁區，那部份的感情，是敏感的，一旦觸碰，就一發不可收拾，滙控（005）也有一個情感的禁區，那一個禁區，就以28元作分界線。
2009年供股價28蚊，成為今日散戶信心分水嶺，股價落入28蚊樓下情感的禁區，某程度就完全代表了散戶對滙控信心已完全崩潰。
滙控弄至今日如斯田地，想找個比較娛樂性的比喻，我會形容為，那就是楊千嬅。想當年2009年，滙控世紀供股，不少股民抱住講金又講心的態度供股，28蚊一股，「捨不得不供股」（引述自當年報道）。於是散戶就先唱一句，「過得到自己，便可體諒你」再唱「世界將我包圍，誓死都一齊」，決定齊上齊落，一齊供股。一直捱到近年，歐洲條數唔得，美國條數唔靚、中港業務一般、裁員、CEO唔撈、停回購，唔少散戶只可以「窮追一個夢」，一個收息夢，於是仍全情投入，股價幾傷都不覺痛。因為滙控基本因素幾一般都好，但散戶仍以炒開有感情去支撐。
至於楊千嬅呢，由出道至今，少女到今日師奶，其唱功和演技同樣都毋庸置疑——好一般，但佢仍可大紅大紫、有好一段時間每年上商台叱咤拎我最喜愛女歌手，賣嘅係心口掛個「勇」字嘅真性情，唱到「原來我非不快樂，只我一人未發覺」嘅感染力。
不過到今日，滙控收息夢要醒了，至於所謂「環球金融、地方智慧」，倒頭來只係「環球金融，沒有政治智慧」，國際舞台上，變得左右不是人。至於當日心口掛個「勇」字個少女，今日「勇」已變「紅」，佢會喺微博影相向大陸士兵致敬、高呼熱愛祖國、會為飯碗跪低刪post……。然後最近有新戲上，為宣傳就受訪將表忠愛國責任卸畀丈夫，然後突然愛香港，強調自己「廣東歌歌手」，幾個動作，就將昔日率真爽直，轟烈和執迷包裝撕破。滙控與楊千嬅，今日同樣變得盡失人心，共通點除了一間是百年老店，一個是樂壇人瑞外，兩者同樣衰左右逢源，食盡兩家茶禮。結論是，出得嚟行，預咗要還。
千頌C