早前北京宣佈《不可靠實體清單規定》，有內地記者仲引述消息，話滙豐可能會喺份清單入面，噚日滙豐股價即時失守30蚊，同當年28蚊股價好近，一班苦主喺網上鳴冤，最大聲就係一班愛國愛港小股東，佢哋最唔忿氣係滙豐明明向京表忠，點解中央都要制裁？
今次滙豐股價大跌，其實好多以往買重當收息保值嘅團體都瀨嘢，好似香港醫學會，90年代已買滙豐當長線投資，義務司庫楊協和接受傳媒訪問，話醫學會持有差不多20萬股，但獅子銀行股價一直跌，又冇股息派，即使日後有息，一年跌10元，派4元股息都冇用，所以嚟緊會傾係咪逐步減持。
除咗醫學會有損失，唔少小股民都慘重，滙豐小股東權益大聯盟中，有愛國愛港小股東對滙豐列入《不可靠實體清單規定》好唔忿氣，「佢哋滙豐已經奶晒共點解都會搞成咁？說好的北水呢？」亦有人貼咗滙豐銀行副主席兼行政總裁王冬勝簽名撐國安法嘅相片，反問：「點解簽咗名都會被列入不可信清單？」亦有人問中央點解唔制裁美資銀行而制裁獅子銀行？有網民揶揄，滙豐以為可以食兩家茶禮，點知得罪晒中美，更重要係北京根本唔當佢係自己人，向京投降根本冇用。
李八方