傅穎（Theresa）「北漂」後回來，不少人說更喜歡她。她17歲做兼職模特兒，其後加入女子組合Cookies正式闖娛圈，餅女九變四，Theresa與鄧麗欣、楊愛瑾及吳雨霏幸運留低，四女在2005年嘗試單飛發展，上位期間是非多，Theresa也爆出變臉、走音、黑面、寸爆等負面新聞。面對演藝事業低潮和感情挫折，她一度失意離港尋出路，「北漂」四年，沉澱後造就了「傅穎2.0」。
回想早年去北京發展，傅穎無依無靠，普通話不靈光，不敢外出，事事不如意，克服過渡期，她反而覺得外闖能擴闊眼光，她日前在尖沙嘴受訪時說：「記得有次同一位內地演員傾偈，我講到喺香港時好多負面新聞，對方話好恨，佢認為有人報道、有noise，代表仲有新聞價值，大家有日唔想睇你，連負面新聞都唔會有。」Theresa馬上開竅，不再耿耿於懷。早年曾壓力爆煲被指患上抑鬱症，「成日聽到有魔鬼同天使兩把聲音同我講嘢，意志唔夠堅定好易被洗腦，我嗰時靠睇好多心理書，強大意志抵抗負面情緒。」
北漂讓Theresa學會獨立，不再執着，知足常樂，她說：「北京返港，掉低咗以前嘅自己，成個人開心咗，我鍾意𠵱家嘅自己。」再見Theresa，她變得豁達率性，經常笑臉迎人，「以前好多人對我第一印象係難相處同好寸，話我講嘢唔真，我想講其實我講嘢不知幾真。我以前又乜都care，介意人哋睇法，所有嘢係我嘅中心，嗰段時間好消極，困入死胡同。我以前係完美主義者，上台跳錯一個step，落台會好唔開心，話我唱歌走音，好想用刀插自己。心情緊張把聲就緊，走過一次音，我下次上台仲驚，覺得全世界等睇我笑話，惡性循環。」
Theresa過去兩年多感情生活交白卷，她說：「啱嘅人可遇不可求，二十幾歲同男仔拍拖，有激情、有火花就一齊，所以好快因了解而分開。人大咗會理智，希望同對方先做朋友，互相觀察溝通，睇吓大家係咪適合先開始。我未必知最鍾意男仔邊個type，不過就一定知最唔鍾意邊種，尤其三觀唔同，好難last long。」
今日36歲生日的Theresa，每天會保持30歲的心境和狀況去等愛，過去情史，她早放下羅仲謙這段不快經歷，她淡然說：「每個人都有過去，過去係經歷，經歷造就成長，先有今日嘅自己。」
撰文：比華利
場地提供：FAM囍公館
髮型：Zap Tang of Essensuals Toni & Guy HK
