有線新聞部早前大地震一次過炒咗三個工程部開台元老，全台上下一片怒火，仲聯署登廣告表達不滿，但新聞部轉頭就再迎接多一個新高層，無綫新聞前副總監許方輝噚日正式履職，被委任做新聞及公共事務副總經理，將會同謝燕娜「共管」新聞部。
現年54歲嘅許方輝，1988年加入無綫做記者，其間去過亞視，又做過公關，2004年重返無綫。
正式入職有線，佢第一日返工喺部門早會上分享理念，強調冇政治任務，希望增加有線新聞喺社會上嘅影響力，又引述老闆話，唔係要將有線新聞變「TVB B隊」。佢仲講現階段冇裁員計劃，仲承諾如果真係要裁員，之前會考慮其他方法處理。
許方輝係短期內第三個空降有線新聞部嘅管理層，本身係有線新聞英文台主播兼主管謝燕娜，8月初先升做新聞及公共事務副總經理，兩個人職級一樣，男方會着重新聞編輯方針管理，女方除管港聞同編輯部份，仲會專注人事、行政管理同英文台。至於前新聞工作者李臻同亞視前新聞及公共事務副總裁陳興昌，就齊齊做新聞總監。有線話，許方輝加入能夠發揮新聞專業，保持有線新聞不偏不倚、公平公正的客觀報道立場，但明眼人都知，做唔做到唔會佢話到事，睇吓佢之前嘅「TVB A隊」咪係最佳例子囉。
李八方