建築邦太太退休多年，以前不時去旅行及參加興趣小組如書法班、鋼琴等，今年因疫情關係，要保持社交距離，在家一日24小時，索性日日研究整餅，自製麵包，佢有啲入廚天份，九個月來自製餅食，有飛躍進步，最近自製鳳梨酥，有台灣手信七八成水準，大編輯有機會食過，大力推薦，請建築邦太太（以下稱阿太）生產幾十個，用靚盒包裝（來自淘寶），每盒六個，用作送禮，阿太只收成本價。左丁山聞訊，唔執輸，搶幾個食吓，味道又幾正喎，於是都要咗十盒八盒，作中秋送禮用。
呢日打電話問公關大姐大：「貴寶號開唔開工？今日是否在家工作？」大姐大話：「今日要開會呀，我地一個星期返兩日，其他時間WFH。」於是拿三盒到大姐大辦公室，叫呢位食家食完畀吓意見，大姐大於最近有見香港人受困於疫情，心情難免苦悶，於是參加咗一個＃ShareASmile行動，希望香港市民戴住口罩同時，也笑口常開。呢個＃ShareASmile行動嘅發起人係香港青年協會同埋銀杏館，一起合作，呼籲不同世代香港人，發揮創意將口罩添上笑容，再將照片上載到fb或Instagram透過社交網絡發佈全港。左丁山傻傻地問：「戴住口罩點影到笑容相片？」大姐大話：「發揮你嘅創意呢，譬如印上一個emoji。」
有笑容當然有益健康，在每日洩氣多一些嘅時期，強顏歡笑都係笑，對住隻奈良鹿話係「大震撼」子嗣，一樣惹笑。但當今失業率上升，貧富懸殊，日日為餐飯有冇着落而發愁嘅五無基層，戴唔戴口罩都唔會笑得出！大姐大話：「呢，所以銀杏館一齊合作嘞，青年協會有年輕人做義工，銀杏館有銀髮一族籌款籌食物及做埋廚房，集合兩代人，連續十日派發福飯畀基層人士，一萬個飯盒由香港社區基金贊助。」咁嘅義務行動，幾有意思，值得支持，每日笑幾次，命都長幾日，見到陌生人戴住口罩打招呼，睇吓對方眼神就知道有冇笑，在風風雨雨的日子，＃ShareASmile別有義意！
聽完大姐大講話，就趕去陸羽，冼董事長好客氣，限聚令改為四人之後就叫左丁山搵埋森哥及林偉雄校友到陸羽食午飯傾吓偈，呢日左丁山特別點咗一份粟米斑塊，真材實料，好味之極，冇法子唔畀幾個like！飯後就收到大姐大口訊：「你送嚟啲鳳梨酥幾正，我要買三盒送畀人！」