曼城後衞基爾獲加可以話係球壇嘅一大賤男，之前畀人揭發背住女友搞大咗一位真人騷女星個肚，但近日英國傳媒就透露獲加嘅未婚妻，亦都背住呢位英格蘭國腳偷食小鮮肉，到底係「現眼報」定係呢對情侶臭味相投，有鋪出軌癮呢？
基爾獲加今年初就爆出背住同佢生咗三個仔嘅女友Annie Kilner，搭上真人騷女星Lauryn Goodman，仲搞大埋人哋個肚，差啲令佢同Annie分手。雖然獲加最後獲得Annie原諒，獲加仲喺今年6月正式向呢位拍咗11年拖嘅女友求婚，不過呢段錯綜複雜嘅感情，未有咁快大團圓結局住。
英國《太陽報》日前爆出，原來27歲嘅Annie今年初同獲加出現感情問題嗰陣，曾經同年僅20歲嘅小鮮肉男模Joshua Cox有過一段情，而且呢段往事最近仲俾獲加發現。爆料嘅消息人士透露，Annie曾經向獲加解釋，當時因為心情低落先同Joshua搭上，當佢同獲加復合之後已經同Joshua斬纜，不過獲加就依然認為兩個人仍然有暗中約會，獲加呢鋪真係「剃人頭者人亦剃其頭」囉。
其實獲加呢位球壇賤男嘅衰嘢又點止背住女友偷食一單咁少，早前英國武漢肺炎疫情最嚴重嗰陣，獲加就被爆出佢同馬列斯、迪利阿里等人違反禁令出去夜蒲。就算之後英國政府勒令酒吧停業亦都阻唔到佢「搵食」，及後又有人踢爆佢租咗個私竇，同另一個朋友搵咗兩個援交學生妹玩4P。
雖然4P事件後獲加畀外界鬧咗鑊甘，最後仲要發聲明道歉，不過呢位英超球星都後死性不改，之後佢又被踢爆同拉舒福特、查頓辛祖同史達寧幾位英格蘭隊友睇網上脫衣舞。雖然獲加今次冇違反禁令，但形象就繼續插水，仲有人話佢帶壞福仔同辛祖，有損國家隊球員形象。
雖然一連串負面新聞未有影響獲加入選國家隊，不過呢位曼城後衞今個月初代表英格蘭鬥冰島嗰陣就領紅，差啲累球隊輸波。家下英格蘭有阿歷山大阿諾特同雲比沙卡兩隻右閘冒起，獲加自己要好自為之喇。