綽號「咖喱范」嘅前立法會議員范國威，雖然已年過50歲，身形仍然勁Fit，最近更頻頻拍片騷肌。向來有運動習慣嘅范國威喺康文署宣佈重開戶外運動設施後，忍唔住即時操練，仲拍片扮「翻滾吧！阿信」，但佢噚日赤裸上身做街頭健身時，就差啲因為後腦撞柱搞到爆缸，事後大叫好痛！
八方問過咖喱范，佢話自己玩街頭健身唔係好耐，近日周圍去試玩，由於政府早前放寬咗限聚令，加上將軍澳唔少公園都有街頭健身設施，所以想搵合適地方為街坊開班強身健體。曾經打拳練大隻嘅佢話，覺得街頭健身嘅技術要求高過打拳，因為一唔小心，就好易扭傷手同腰，所以都係覺得搵專業教練去學會好啲。
唔少網民睇到范國威嘅騷肌相，都讚佢身形勁Fit，「犀利，好臂力，好腰力」，又笑指「操fit的（啲）就啱喇，以後幾個工聯會都埋唔到身」。最多網民則叫佢小心，唔好亂做危險動作免整親。
李八方