肥仔K個女小N上堂用Zoom，日日一臉煩悶之色，心不在焉，用電腦唔純熟，唔識回應，叫阿嫲幫手，阿嫲幾十年前學過FORTAN，COBOL，現在已完全被淘汰，邊度識調校Zoom軟件吖，所以上課三小時，小N經常眈天望地；得啖笑，阿嫲見狀，嘆一口氣：「若長期如此，根本學唔到乜嘢。」呢日，小N直情上堂時寫張紙仔畀阿嫲：I hate computer class，阿嫲唯有苦笑，只望9月23日之後，可以正式返學，情況會改善啲。
印尼教育部長Nadiem Anwar Makarim最近有感而發，指印尼為咗防止疫情，跟隨世界步伐，學校停課，改用網上遙距授課，但好快就發現，遙距學習對教學效果及質素有負面影響，但全世界政府對此不予重視，只係關心防疫防毒及經濟收縮，好少關注教育危機，學習危機。呢位部長呼籲各國政府正視疫情之下嘅教育問題，最逼切如不少學生根本缺乏足夠資源（如電腦、iPad、手機、寬頻上網及家中寧靜環境）進行有效嘅網上學習。
印尼係一個島國，人口之中，只有40%可以上網，大部份集中於大城市，故此香港要取消教育電視，印尼反而要緊急開拓電視教育，課程方面就濃縮課程，聚焦於語文及計算兩大項，並同時向學生提供流動數據用品之津貼等等。
香港唔好以為自己先進而沾沾自喜，香港其實亦有印尼嘅問題，只係規模細啲而已。
聯合國兒童基金認為學校重開，已成為一個熱門政治話題，世界性疫情到目前為止未有放緩跡象，歐洲有疫情反彈，美國已有近二十萬人死亡，全球有192個國家封校，14億多學生不能回校上課，起碼有二千四百萬名學生索性退學。網上教育於是成為風尚，但全球有四億六千萬學生冇上網措施或流動電腦，根本不能參與網上教學。怎麼辦？UNESCO、UNICEF、WHO一同出版一個十頁紙嘅文件，內含重開學校及如何運作嘅衛生指引，希望各國學校可以在衛生安全環境下恢復上課面授。
疫情帶來之教育挑戰，由幼稚園至研究院學生，均有上課難之嘆，在學校結交朋友，有群體生活經驗，係人生教育不可或缺嘅一部份，若一味在家孤獨上堂，長大後難免有缺點，缺憾，在不太凶險情況下恢復上課，係緊急需要。