為咗迎接下月初嘅世盃外圍賽，兩支南美洲勁旅阿根廷同巴西都分別點兵，其中阿根廷續有球王美斯領銜。不過早前有消息話，西班牙政府要求由南美國家入境人士強制隔離14日，即係美斯踢完外圍賽返嚟有可能缺陣三場賽事，包括10月尾嘅西班牙國家打吡，有指巴塞方面打算向西甲賽會申請延期。至於宿敵巴西就有尼馬、菲臘比古天奴、加比爾捷西斯同埋堤亞高施華等主力入選。