【風水專題】術數家蔣匡文幫《蘋果》讀者睇家居風水，南昌站匯璽一個實用271方呎開放式單位，業主花600多萬元買，呎價逾2萬元，惟樓盤位處「濕淫之地」，想生仔好艱難，但戶戶風水大不同，所睇單位窗外望見大帽山，有利文昌可成名。同時，單位佈局犯了新樓常見的三個毛病，包括「火燒心」、「穿心煞」及「橫樑壓頂」，影響住戶健康。
蔣匡文指，睇風水最緊要睇「龍、砂、水、穴」。龍代表山脈，砂代表四周環境，水代表海又代表路，穴代表單位座向。四方面都好，代表有財、有地位、有老婆仔女兒孫、有壽等等，缺少1至3樣，某方面或有缺失，例如「窮書生但相識滿天下」等。
從外圍環境而言，他指匯璽位處填海地，又稱「濕淫之地」，求丁較難，「唔係話冇仔生，係辛苦啲，機會低啲，生女就冇問題。」他睇風水有所謂「排龍訣」，根據建築物四周的路有一種計算方法，結果有12個，其中5個屬吉，一般主有福，有利功名利祿等；7個屬凶，或不利六親、財運、事業等，而匯璽所得結果為吉星，代表有福。
今次睇風水單位是實用271方呎的開放式，客廳窗向正北，大門向正南。窗戶遠望香港最高的大帽山，又稱「祖山」，從單位可見，由最高山峯，一層層向下而落，見其他山峯，是「層層下殿」之格局，不同座向有此格局會有不同效果，目前這個單位正北而言，屬吉利，「大帽山好似支筆，望到係有利文書工作嘅人，可以出到名。」
不過，近一點看見望到一幢大廈外形似有個口，容易招惹是非，「遇到唔好嘅流年會遇到麻煩。但如果佢做文書工作，反而就啱咗佢命格。」據了解業主是一名老師，正迎合了他的命格。
最後，蔣匡文指出三個常見新樓風水毛病：一、火燒心，即廚房在屋中間，對屋內夫婦身體有影響；二、橫樑壓頂，客廳天花被四邊條橫樑壓頂，而該位置正是預留放置睡床，「砸住邊，邊到就會唔舒服」；三、穿心煞，又稱「穿堂煞」，不利聚財聚福。
