對決場次︰車路士vs利物浦
上星期又再次成為咗燈神，不過今個禮拜我就有信心，可以贏番守丹一次破「燈」！事關今次我要捧嘅球隊，相信係連我嘅燈力，都唔會燈得死嘅利物浦，撐佢哋可以作客拆「車」。
利物浦喺開鑼戰4:3險勝列斯聯，對住「升班馬」都要失三球？唔少人都覺得紅軍表現唔夠好，但由比爾沙帶領嘅列斯聯唔係人咁品，搶波好似搶錢咁狼死，紅軍可以贏得到，我就話佢哋有運就真，而呢種運氣亦係贏冠軍嘅必要條件，相信唔會第二場就失分。
事實上，利物浦上年開季都係咁失波啦，頭15輪得2場保持清白之身，最後又咪贏冠軍，最緊要前面夠fit，其中穆罕默德沙拿就夠晒搶口，開鑼日已經入咗三粒，幾乎射親都中，今仗好大機會再有波入！點解？因為車路士最大嘅問題，係仲用緊人矮手短嘅阿列沙巴拿加守龍，呢位門將就衰在過份自信，唔聽領隊支笛之餘，嚟咗英超兩年已經輸咗成19球遠射，上兩季已經俾沙拿、史杜列治同阿諾特禁區外射死，今次利物浦又可以當佢箭靶咁射。
而且外界都話車仔增兵之後，有實力挑戰冠軍，利記梗係要趁你未成氣候打殘你啦，新兵夏維斯上場連轉方向都踢出界。功力唔及高普嘅林柏特，似乎仲未令班新兵融入，踢得最好嘅迪姆華拿仲要有傷，既然利記上季都可以雙殺車仔，相信沿用近兩年冠軍班底嘅紅軍，實力同默契仍然贏未執掂嘅車路士，今仗肯定反客為主，紅軍讓平/半上盤冇走雞喇！
文：尊嘉
《一燈決》係今季新欄目，由上月擂台盟主同上月燈神拗吓頸，睇吓讀者信邊個。