對決場次︰車路士vs利物浦
話晒都係上個月擂台盟主，新欄《一燈決》梗係頭威頭勢，阿仙奴作客富咸個上盤都算開得好輕鬆，睇嚟燈神尊嘉兄真係要努力啲喇。今輪我哋繼續拗吓英超，揀場車路士對利物浦傾吓，講明先，我覺得呢架解款「車」呢場應該唔使輸。
雖然雙曼仲未出場，但英超踢晒頭輪之後都有多少新氣象，今個星期做主角嘅車仔同紅軍更加唔使講；藍軍今季起勢增兵，意圖都好明顯，第1周作客白禮頓贏3:1其實係意料中事，咁多新人雖然未一次過見晒，不過前線嘅迪姆華拿係有啲料，雖然上場之後見佢好似傷傷地，不過呢啲後生應該冇咩大問題嘅，至於另外一個德國新兵夏維斯就好似未夾到，要再睇睇。
雖然車仔近10季英超主場對紅軍贏得嗰兩場，但今場信解款「車」主場唔使輸，關鍵除咗係尊嘉揀利記之外，紅軍條防線都好似冇上季咁堅揪。
話說上輪紅軍主場對列斯聯讓到球半/兩球，最後佢哋係就係贏4:3贏波輸盤，個頭細咗一半嘅穆罕默德沙拿又明顯同熱身賽好唔同鬼死咁有態，但慘就慘在後面唔得，世界最強中堅華基爾雲迪積克（VVD）都會派膠嘅，同埋要留意一樣嘢，紅軍喺俾武肺玩完一輪後，復賽後嘅作客表現真係油麻地，今季英超開得咁快，唔係好信佢哋咁快tune得返正。
今場車路士主場受讓平/半，食唔食得晒就好難講，但和住嚟賭呢半個盤應該就穩陣。
文：守丹
《一燈決》係今季新欄目，由上月擂台盟主同上月燈神拗吓頸，睇吓讀者信邊個。