經過一輪風風雨雨後美斯都係留返喺巴塞，但球隊各項風波都未平息晒喎。前巴塞教練施迪安禮拜四發表聲明，話佢同佢嘅教練團成員8月中被炒之後，今個星期三先接獲正式通知。施迪安同巴塞份約原定下年夏天先屆滿，而據悉又因為佢得唔到球會任何賠償，所以就決定正式入稟西班牙法院告巴塞違約，追討400萬歐元賠償。另一方面，由巴塞董事會成員發起，罷免會長巴杜美嘅行動收集咗超過20,000份簽名，通過咗舉行罷免投票嘅門檻。巴塞將會喺10日內確認有關簽名嘅有效性，只要有效簽名達到16,521個，球會就必須舉行正式嘅罷免投票。如果到時支持巴杜美下台嘅票數達3分之2嘅話，巴杜美就會即時下台，美斯開心啦！