近月協助中共加強整肅香港教育界，似大陸幹部多過港府官員嘅教育局局長楊潤雄，前日透過教育局發言人不點名反駁前特首梁振英對佢嘅批評，強調自己從來冇抱住「唔好搞大佢」嘅態度，指689批評時需要基於事實。689秉持佢嘅政壇痴漢兼咬住唔放作風，噚日再喺facebook出po追咬楊潤雄。
教育局發言人前日話，對於嚴肅處理失德教師嘅學校、尤其係涉事教師已經離職嘅個案，公佈有關學校名稱有欠公允。689睇到後好不滿，噚日喺fb出po話醫生被投訴專業失德，研訊後懲罰不論輕重都會公開醫生受罰決定，但教師現時即使被投訴，教育局完成調查並作懲罰後，都唔公開教師或者學校名稱，對家長不公喎。
689仲咬楊潤雄日前接受訪問時「仍然大言不慚」，質疑佢話教育局對做出普遍社會不可接受行為嘅教師會「採取行動」嘅說法唔夠力，「發一紙公文就算行動？這是嚴重失職」。政治就係咁玄，楊潤雄話晒做過689下屬，佢捱得過689年代，以為跟林鄭就冇事，點知反過來俾689狙擊。不過當林鄭都形容自己唔識政治、只懂管治，楊潤雄呢啲都係咎由自取。
李八方