上季喺皇家馬德里坐多過踢嘅加里夫巴利，終於有機會走人，有指31歲嘅佢已答應以外借身份回歸熱刺1年，只要兩球會傾掂數，巴利就會即刻起程，據報佢預計喺周五飛倫敦。
英媒透露，巴利周三已經同熱刺傾好條件，準備外借一年重返英超，熱刺就要向皇馬畀約1,300萬鎊（約1.3億港元）嘅借用費，只要皇馬批准，「大聖爺」就即刻走人。巴列特表示：「雖然仲有啲細節處理緊，但今年絕對係巴利七年嚟最接近離開皇馬嘅時刻。今次交易好複雜，但差唔多搞掂，相信好快成事。」巴列特仲話：「摩連奴已經同巴利傾過，講話佢返熱刺嘅話會扮演重要角色。」
2013年以破世界紀錄1億歐元由熱刺加盟皇馬嘅巴利，贏過2次西甲同4次歐聯。當年基斯坦奴朗拿度走人，個個都以為巴利可以成為「艦隊」大佬，但年紀漸大嘅巴利開始受傷患困擾外，皇馬仲要回馬槍又搵施丹教，巴利同呢位當日喺歐聯決賽貶佢做後備嘅教練，亦開始傳不和。上年11月，一直指有傷冇為皇馬上陣嘅巴利，反而喺歐國外幫威爾斯踢，贏咗歐國盃決賽周資格後，佢仲舉起一張順次序寫住「威爾斯、高球、馬德里」嘅旗幟，呢個幼稚行為已經令佢喺皇馬冇運行。
上季巴利只為皇馬上陣1,260分鐘，坐擁35萬歐元周薪嘅佢平均每分鐘上陣就要花皇馬23,800歐元，巴利復賽後全程只可以坐喺看台冇得落場，為咗表達不滿，巴利仲成日喺看台做「小動作」，例如用口罩當眼罩公然瞓覺，之後仲唔理球隊歐聯次合回對曼城，備戰嗰陣又去打golf，同皇馬嘅關係幾乎徹底破裂。熱刺雖然同巴利好事近，但有傳同摩佬不和嘅迪利阿里，最近又落選歐霸外嘅大軍。英媒有指佢好可能會被交易去皇馬，作為引入巴利嘅條件之一。