由前華倫西亞班主林榮福，同埋曼聯92班碧咸、傑斯、史高斯等人做班主，近5年4次升班嘅英乙沙福特城，周三喺英聯盃作客挑戰英超愛華頓，結果因為實力所限，就算有班主之一嘅加利尼維利撐場，沙城都要慘吞安察洛堤帶領嘅愛華頓三蛋，次圈就畢業。英超開鑼戰作客1:0贏熱刺嘅「拖肥」今場換咗10個人，占士洛迪古斯、阿倫盧利奧同卡維特利雲都冇出，得中堅米克堅尼繼續正選，結果呢名英格蘭中堅開賽八分鐘就頂入，幫主隊半場領先1:0。下半場繼續係愛華頓天下，基菲爾施古臣入一粒，加埋摩斯堅恩入12碼，最終炒沙城三蛋。
同係英超就嘅列斯聯就慘喇，同日主場打和英甲侯城1:1，之後仲射輸12碼，可以專心踢英超喇。同日出局嘅英超隊仲有強陣出擊嘅修咸頓，有丹尼艾格斯掛帥都喺主場輸畀英冠賓福特0:2，真係失威。