英國《每日郵報》報道，英政府本身喺10月1號起會放寬人群限制，但因為當地嘅武肺感染率再升，英超隨時會推遲到11月，先會開放球迷入場，加埋最近英冠、英甲同英乙嘅比賽測試，亦只放寬至上限1,000球迷入場，報道話如果10月都冇辦法開放球場，英超球會每個月會再損失1億鎊（約10億港元），真係慘。不過就算球場重開，但據報最多只可以放25%至35%球迷入場，同時球迷間都要保持一米社交距離，英超球會可以話係蝕硬。英國體育大臣杜永敦就話：「我哋理解球迷重新入場嘅需求，但就一定要承認我哋面對緊武肺嘅不利因素。我知道好多球迷都想入場，我哋會喺安全嘅情況下做嘢㗎喇。」