六月可以自由組局吃飯之時，曾與一位相識三十幾年嘅律師吃午飯嘆意大利菜，記得當日問過佢退休之後，點解唔似其他人咁在律師樓做顧問律師，佢話對目前好多律師講金不講心，感到厭倦，退休後不想再問世事，最想周圍旅行去外地聽音樂會，點知疫情不息，行不得也哥哥，在家悶到暈，只好聽佢最喜歡嘅女鋼琴家Martha Argerich解吓悶。佢最感到痛心嘅係佢以前港大法律系嘅同學好多做咗藍絲，贊成有國安法（六月時還未實施），搞到佢心淡，不再與校友交流，佢當時話：「現在未知國安法會係點，但在港大法律系畢業嘅律師，受過嚴格普通法訓練，點可能同意國安法，由人大常委會加諸香港而我地一啲草稿都未見過。」之後未再有機會見過佢，相信佢現在更氣憤無奈。
乜唔係啫，依家執法人員視國安法為尚方寶劍，甚麼是煽動，甚麼是勾結，只有佢地知。發生事故之後，例如有人涉嫌違反國安法/暴動而潛逃，被內地海警捕獲，佢地現時在內地有無法律權利，大家根本矇查查，呢12人嘅家屬哀求特區政府幫忙，講笑咩，邊度肯吖。內地法律制度與香港相差太遠，內地有維權律師想幫忙，就被拒絕，改由「官派律師代表」，如此做法，在內地視為正常，在香港則係人都知違反疑犯權益；又例如曾批評習近平嘅內地紅二代、華遠集團前董事長任志強被捕，涉嫌貪污，挪用公款，呢類案件理應與國家安全無甚關係，但北京警方嚴陣以待，以疫情為理由，拒絕旁聽，外國大使館人員亦被拒絕，記者要退至法院正門口外五十米，如此程序，香港人又未見過。
但或者會在不久將來，香港人會目睹嘅嘞。黨媒不斷猛烈攻擊本港法律制度，首先指香港從來冇三權分立，講三權分立就是別有用心，又指控某些法官係黃官，民建聯議員葛珮帆周浩鼎發功投訴，凡此種種都令人覺得風雨欲來，裏應外合，整頓司法機關為期不遠了；策略係由黨媒發動攻擊，有心人發動網上民意調查，藍絲大力響應支持，製造民意基礎，又有兩位洋大炮江樂士與列顯倫出文章護航，自然少不了三位權威梁愛詩譚惠珠湯家驊接受訪問，最後林鄭咪行政主導做嘢囉！啲民主派議員仲一碌木咁，話不能接受延期，要退出立法會，苟如是，即係立即扯白旗投降，吾不欲觀之矣！