上個禮拜重心利物浦贏波輸盤，反而兩場配腳紐卡素下盤同熱刺「細」就中晒， 時也命也。今次轉場推介美職聯，美職聯已經進行超過10周，之前喺奧蘭多泡沫賽地搞比賽，𠵱家各隊已返晒所屬主場，主場優勢加番唔少，禮拜五有上屆冠軍西雅圖海灣者主場出擊，面對攻強守弱嘅FC洛杉磯，信主隊再下一城，平手盤要得過。
海灣者屬上屆冠軍，主場威力亦強，今季7戰拎到4勝2和1負，輸嗰場係打吡大戰不敵波特蘭伐木者，不過全場屬較具優勢一方，輸在把握力唔及對手，打吡戰輸波後，海灣者上場即將怒火發洩喺聖荷西地震身上，狂炒7:1，秘魯前鋒雷迪亞斯同烏拉圭中場盧迪路呢對進攻核心，都真係幾屈機，難得今次係海灣者連續三場主場，唔使舟車勞頓。
FC洛杉磯其實攻力都唔錯，好似有迪亞高羅斯、巴利胡禮菲臘斯等球星，累積25個入球亦係美職聯之冠，不過球隊攻強守弱，上仗主場贏伐木者都要失兩球，今季3場作客輸晒共失9球，平手博唔過。
禮拜六日乙有兩支愛隊出場，榜首北九州向日葵更係人見人愛，開季19場贏13場，作客近5場亦4勝1和，今場作客山形山神，客W可捧。
另一愛隊係FC琉球，不過呢種愛同向日葵唔同，琉球係2019年「升班馬」，但實力每下愈況，睇怕今季都好大機會降班，可長追佢對家；相反水戶蜀葵作客唔差，客W都一樣可以串埋。
文：Goal進